+389 70 700 712
info@mountainguide.mk
| Период | Достапност од 20.06. до 01.09. (со закажување) 📅 |
|---|---|
| Локација | Алпи, Италија |
| Тежина | Физички ⬤⬤⬤⬤○ / Технички ⬤⬤⬤○○ |
| Услови | Активен планинар, искуство над 2500 мнв во зима |
| Тип | Мала група до 4 учесници |
Италијанската страна на Мон Блан е помалку комерцијална од француската и изобилува со различни насоки според својата тежина, а класичната рута преку домот Гонела е физички најтешка во однос на останатите две планинарски рути од француска страна (Де Гуте и Траверсот на трите планини), затоа што стартот е ниско од долината Вал Вени (околу 1700 мнв) и со ноќевање во домот Гонела на 3070 мнв има предизвикувачки завршен успон од околу 1800 висински метри.
Оваа насока се нарекува уште и “Папската рута“ бидејќи во рамки на првото минување во август 1890-та година (надолу) дел од петчлената група планинари бил и Ахиле Рати, кој подоцна во 1922 година е избран за римски папа и на оваа позиција останува до својата смрт во 1939 година.
Планинарскиот водич е значајна алка на секоe високогорскo искачување и со своето искуство, вклучително и на планината и врвовите кои се цел на експедицијата, значајно придонесува за правилниот пристап, безбедноста и успехот на тимот.
Ден 1. Превземање од локален аеродром или средба во долината Аоста
Ден 2. Аклиматизационо искачување на 4000 мнв
Ден 3. Одмор и подготовка за искачување
Ден 4. Искачување до дом Гонела 3070 мнв
Ден 5. Искачување на Мон Блан 4810 мнв
Ден 6. Резервен ден
Ден 7. Транспорт до аеродром
Можност како 7 дневен пакет или ангажман на водич само за успон (2 дена)
Вклучено во 7 дневен пакет:
Комплетна организација на акцијата со искусен планинарски водич.
НЕ е вклучено во цената: Авионски лет до локален аеродром (Базел, Женева или Милано), лична планинарска опрема (можност за изнајмување на техничка опрема), исхрана за време на турата, планинарско осигурување валидно за алпски искачувања (25-30 евра), сите трошоци од лична природа.
Важно: Секој учесник потпишува изјава дека е во целост свесен за ризиците кои со себе ги носи високогорското планинарење на Алпите над 4000 мнв, како и наведената програма за искачување на врвот Мон Блан, дека одговара за својата психо-физичка подготовка и учествува на акцијата во на своја сопствена одговорност. Секој член на акцијата како активен планинар превзема одговорност за својата способност за автономија во движењето, но и дека ќе се придржува и во целост ќе ги почитува насоките на водичот на акцијата.
Задолжително е претходно планинарско искуство од најмалку пет години.
Умерени способности на фирн и лед (способност за самостојно движење до 35 степени нагиб) и добра кондиција за целодневно планинарење со 40 литарски ранец, вклучително и движење во ноќ со челна ламба. На денот на завршниот успон поаѓаме кон врвот на полноќ, предвидено е време од 9 до 10 часа до врвот, вкупно 17-18 часа со враќање во долината Вал Вени.
За време на успонот се движиме со алпски ранци 35 до 45 литри, со лична опрема, храна и течности. Движењето на завршниот успон е во глечерска наврска.
Секој учесник добива детална листа и насоки околу потребната опрема.
Сите учесници треба да имаат базично познавање и вежби за движење во глечерска наврска. Задолжително е членство во планинарски или алпинистички клуб, како и посетена зимска планинарска обука.
Пријавување и резервација зависно од достапност на термини.
Месец јули е најсоодветен за безбедно искачување на оваа насока.
Пријавувањето се смета за комплетно со пополнета пријава и уплата на депозит.
